1. A touz ceulx qui ces lettres verront, Guillaume de Hangest, garde de la prevosté de Paris, salut. Nous fai
2. sons asavoir que comme contemz et descort feust meuz entre nous et Etienne Barbete par reson de la
3. voierie, d’une part, et monseigneur Gile, seeleur l’evesque de Paris, curé de Saint Innocent, d’autre part, pour
4. reson de pluseurs huiseries et fenestres que le dit monseigneur Giles avoit fet ou fet faire en son droit,
5. si comme il disoit, c’est a savoir en sa meson que il a a Saint Innocent, tenant d’une part a la
6. fontaine Saint Innocent et d’autre part au cemetiere Saint Innocent, par devers la rue au Feure, la
7. quele meson li appartient tant de par s’eglise comme de son conquest, les quiex huiseries et fenestres nous
8. et le dit Estienne supposions a l’encontre en disant que elles ne pooient estre faites en la maniere
9. que elles estoient pour ce que ce estoit le prejudice le roy et dudit voier, si comme nous et le dit
10. voier disions ; en la parfin, les devant dites parties vouldrent et acorderent de leur bone volen
11. té que les jurez de la ville de Paris, maçons et charpentiers, veissent le descort devant dit
12. et ce que il entrouveroient et diroient que il fust tenu et gardé des dites parties, les quiex
13. jurez de la ville de Paris c’est assavoir mestre Jehan de Rueul, mestre Guillaume de Londres, mestre
14. Richart de Forest, mestre Evrart de Vilers et mestre Eude Leschassier, distrent leur dit et
15. raporterent en nostre presence et en cele dudit voier et en cele dudit monseigneur Giles en la fourme
16. qui s’ensuit : c’est asavoir que ledit monseigneur Gile fesoit et povoit fere ce qu’il avoit commencié
17. et pooit tenir en son droit ce qui estoit fait et que il ne fesoit ne n’avoit fet fere chose
18. qui feist prejudice a nullui ; et nous, prevost de Paris, veu le leu desus dit avecques les diz
19. jurez et oï le recort des diz jurez, absolvirent et absolvons le dit monseigneur Giles des choses de
20, 21, 22. vant dites, sauf le droit nostre seigneur le roy et tele joustice comme il i avoit acoustumé a avoir par devant la confection de ces lettres. En tesmoig de ce nous avons mis en ces lettres le seel de la prevosté de Paris, l’an de grace mil CC IIIIxx et quinze, le mecredi aprés la feste Saint Jaques et Saint Chistofle.
